போற்றித் திருத்தாண்டகம்

 உ

திருசிற்றம்பலம்

சிவனே சக்தி சக்தியே சிவம் 

திருநாவுக்கரசர் அருளிய போற்றித் திருத்தாண்டகம் 

கற்றவர்கள் உண்ணும் கனியே போற்றி

கழலடைந்தார் செல்லும் கதியே போற்றி

அற்றவர்கட் காரமுதம் ஆனாய் போற்றி

அல்லல் அறுத் தடியேனை ஆண்டாய் போற்றி

மற்றொருவர் ஒப்பில்லா மைந்தா போற்றி

வானவர்கள் போற்றும் மருந்தே போற்றி

செற்றவர்தம் புரம் எரித்த சிவனே போற்றி

திருமூலட் டானனே போற்றி போற்றி

வங்கமலி கடல் நஞ்சம் உண்டாய் போற்றி

மதயானை ஈருரிவை போர்த்தாய் போற்றி

கொங்கலரும் நறுங்கொன்றைத் தாராய் போற்றி

கொல் புலித்தோல் ஆடைக் குழகா போற்றி

அங்கணனே அமரர்கள் தம் இறைவா போற்றி

ஆலமர நீழல் அறம் சொன்னாய் போற்றி

செங்கனகத் தனிக்குன்றே சிவனே போற்றி

திருமூலட்டானனே போற்றி போற்றி

மலையான் மடந்தை மணாள  போற்றி

மழவிடையாய் நின்பாதம் போற்றி  போற்றி

நிலையாக எந்நெஞ்சில் நின்றாய் போற்றி

நெற்றிமேல் ஒற்றைக்கண் உடையாய் போற்றி

இலையார்ந்த மூவிலைவேல் ஏந்தி போற்றி

ஏழ்கடலும் ஏழ்பொழிலும் ஆனாய் போற்றி

சிலையாலன்று எயிலெரித்தசிவனே போற்றி

திருமூலட் டானனே    போற்றி போற்றி

பொன்னியலும் மேனியனே போற்றி போற்றி

பூதப்படையுடையாய் போற்றி போற்றி

மன்னியசீர் மறைநான்கும் ஆனாய் போற்றி

மறி ஏந்து கையானே போற்றி போற்றி

உன்னுமவர்க்  குண்மையனே போற்றி போற்றி

உலகுக்கு ஒருவனே போற்றி போற்றி

சென்னி மிசை வெண்பிறையாய் போற்றி போற்றி

திருமூலட்டானனே போற்றி போற்றி

நஞ்சுடைய கண்டனே போற்றி போற்றி

நற்றவன் நின்பாதம் போற்றி போற்றி

வெஞ்சுடரோன் பல்லிறுத்த வேந்தே போற்றி

வெண்மதியங் கண்ணி விகிர்தா போற்றி

துஞ்சிருளில் ஆடல் உகந்தாய்  போற்றி

தூநீறு மெய்க்கணிந்த சோதீ போற்றி

செஞ்சடையாய் நின்பாதம் போற்றி போற்றி

திருமூலட்டானனே போற்றி போற்றி

சங்கரனே நின்பாதம் போற்றி போற்றி

சதாசிவனே நின்பாதம் போற்றி போற்றி

பொங்கரவா நின்பாதம் போற்றி போற்றி

புண்ணியனே நின்பாதம் போற்றி போற்றி 

அங்கமலத் தயனோடு மாலும் காணா

அனல் உருவா நின்பாதம் போற்றி போற்றி

செங்கமலத் திருப்பாதம் போற்றி போற்றி

திருமூலட்டானனே போற்றி போற்றி

வம்புலவு கொன்றைச் சடையாய் போற்றி

வான் பிறையும் வாளரவும் வைத்தாய் போற்றி

கொம்பனைய நுண்ணிடையாள் கூறா போற்றி

குரை கழலால் கூற்றுதைத்த கோவே போற்றி

நம்புவரக்கு அரும்பொருளே போற்றி போற்றி

நால் வேதம் ஆறங்கம் ஆனாய் போற்றி

செம்பொருளே மரகதமே மணியே போற்றி

திருமூலட்டானனே போற்றி போற்றி

உள்ளமாய் உள்ளத்தே நின்றாய் போற்றி 

உகப்பார் மனத்தென்றும் நீங்காய் போற்றி

வள்ளலே போற்றி மணாளா போற்றி

வானவர்கோன் தோள்  துணித்த மைந்தா போற்றி

வெள்ளை ஏறேறும் விகிர்தா போற்றி

மேலோர்க்கும் மேலோர்க்கும் மேலாய் போற்றி

தெள்ளுநீர்க் கங்கை சடையாய் போற்றி

திருமூலட்டானனே போற்றி போற்றி

பூவார்ந்த சென்னிப் புனிதா போற்றி

புத்தேளிர் போற்றும் பொருளே போற்றி

தேவார்ந்த தேவர்க்கும் தேவே போற்றி

திருமாலுக்கு ஆழி அளித்தாய் போற்றி

சாவாமே காத்தென்னை ஆண்டாய் போற்றி

சங்கொத்த நீற்றெம் சதுரா போற்றி

சேவார்ந்த வெல்கொடியாய் போற்றி போற்றி

திருமூலட்டானனே போற்றி போற்றி

பிரமன்தன் சிரம் அரிந்த பெரியோய் போற்றி

பெண்ணுருவோடு ஆணுருவாய் நின்றாய் போற்றி

கரம்நான்கும் முக்கண்ணும் உடையாய் போற்றி

காதலிப்பார்க்கு ஆற்ற எளியாய் போற்றி

அருமருந்த தேவர்க்கு அரசே போற்றி

அன்றரக்கன் ஐந்நான்கு தோளும் தாளும்

சிரம்நெரித்த சேவடியாய் போற்றி போற்றி

திருமூலட்டானனே போற்றி போற்றி

திருச்சிற்றம்பலம்  திருச்சிற்றம்பலம் 

மேலும் போற்றி பாட 

சிவபெருமான் போற்றி